پی آئی اے کی کراچی سے گوادر کے لیے مزید دو نئی پروازیں اگست کے پہلے ہفتے سے شروع ہوں گی،جنید انوار چوہدری

وفاقی وزیر بحری امور محمد جنید انوار چوہدری نے اعلان کیا ہے کہ پی آئی اے کراچی سے گوادر کے لیے مزید دو نئی پروازوں کا آغاز اگست کے پہلے ہفتے سے کیا جائے گا۔ انہوں نے کہا کہ تجارتی سرگرمیوں کے فروغ کے لیے فضائی رابطوں میں توسیع ناگزیر ہے۔
محمد جنید انوار چوہدری نے بتایا کہ اس وقت کراچی سے گوادر صرف ایک پرواز چل رہی تھی، جس میں اضافہ ایک اہم پیش رفت ہے۔ یہ اقدامات وزیراعظم کے کاروبار دوست وژن کا عملی اظہار ہیں۔
انہوں نے کہا کہ گوادر فری زونز کی فعالی کے لیے بہتر فضائی رسائی بنیادی حیثیت رکھتی ہے اور فضائی سہولیات سے سرمایہ کاری اور تجارت کے مواقع میں اضافہ ہوگا۔ وزیر بحری امور نے کہا کہ تاجر برادری، پورٹ عملے اور لاجسٹکس سیکٹر کو سہولت فراہم کرنا حکومت کی ترجیحات میں شامل ہے۔
سی پیک منصوبوں کی بروقت تکمیل کے لیے فضائی رابطے ناگزیر ہیں اور پروازوں کی تعداد میں اضافہ گوادر میں معاشی ترقی کا نیا باب کھولے گا۔