لاہو ر:انسدادِ دہشت گردی عدالت لاہور نے 9 مئی تھانہ شادمان اور راحت بیکری جلاؤ گھیراؤ کے 2 مقدمات کا محفوظ فیصلہ سناتے ہوئے پی ٹی آئی کے رہنما شاہ محمود کو بری کردیا جبکہ ڈاکٹر یاسمین راشد، میاں محمود الرشید، اعجاز چوہدری کو 10، 10 سال قید اور عالیہ حمزہ اور صنم جاوید کو 5، 5 سال قید کی سزا سنا دی۔
انسدادِ دہشت گردی عدالت لاہور کے جج منظر علی گل نے 2 مقدمات کا محفوظ فیصلہ سنایا۔
فیصلے میں عدالت نے شاہ محمود قریشی کو دونوں مقدمات میں بری کردیا، شاہ محمود قریشی کو شادمان تھانہ جلاؤ گھیراؤ اور پولیس کہ گاڑیاں جلانے کے مقدمات سے بری کیا گیا۔
عدالت نے سابق گورنر پنجاب سرفراز چیمہ کو 10 سال قید کی سزا کا حکم دیا، ڈاکٹر یاسمین راشد، محمود الرشید اور اعجاز چوہدری کو 10، 10 سال قید کی سزا کا حکم دیا گیا۔ان کے علاوہ عدالت نے پی ٹی آئی رہنما عالیہ حمزہ اور صنم جاوید کو 5، 5 سال قید کی سزا سنائی۔
عدالت نے تھانہ شادمان نذر آتش کیس میں 12 ملزمان کو بری کیا جب کہ 13 ملزمان کو سزا سنائی، بری ہونے والوں میں سلمان احمد، عبدالقادر، فیضان، طیب سلطان، شاہد بیگ، ماجد علی ، بخت رواں، سہیل خان، اویس، رفیع الدین، فرید خان شامل ہیں۔
عدالت نے راحت بیکری کے باہر جلاؤ گھیراؤ کیس میں 10 ملزمان کو بری اور 7 ملزمان کو سزا سنائی۔
عدالت نے بانی پی ٹی آئی کے گارڈ حافظ ارشد کو دس سال قید کی سزا سنائی گئی، بیکری کے باہر پولیس کی گاڑیاں جلانے کے مقدمے میں 10ملزمان کو بری کیا گیا۔
عدالت نے عائشہ بھٹہ کو 10 سال قید کی سزا کا حکم دیا، 5 کم عمر ملزمان کو بری کردیا گیا، عالیہ حمزہ اور صنم جاوید کو ایک، ایک لاکھ روپے جرمانے کا حکم دیا۔
یاد رہے کہ جمعرات کو انسداد دہشت گردی کی عدالت نے دونوں مقدمات کا فیصلہ محفوظ تھا، مقدمے میں 45 ملزمان کے ٹرائل ہوئے جن میں سے 25 گرفتار جبکہ 15 اشتہاری ہیں اور ایک ملزم کا انتقال ہوچکا ہے۔
