لاہور: پولیس نے علیمہ خان کے بیٹے کی گرفتاری کی تصدیق کر دی۔
ڈی آئی جی انویسٹی گیشن کے مطابق ملزم شاہ ریزعظیم 9 مئی کے مقدمات میں لاہور پولیس کو مطلوب تھا، ملزم کو آج عدالت میں پیش کیا جائے گا، ریاست مخالف سرگرمیوں میں ملوث افراد کسی رعایت کے مستحق نہیں۔
یاد رہے کہ اس سے قبل عمران خان کی بہن علیمہ خان نے دعویٰ کیا تھا کہ 4 مسلح نقاب پوش ان کے بیٹے شاہ ریز کو گھر سے اغوا کرکے لے گئے ہیں۔
علیمہ خان کا کہنا تھا کہ سادہ کپڑوں میں ملبوس 4 مسلح افراد کچن کے راستے گھر میں داخل ہوئے، ان کا بیٹا اپنی بیوی اور والد کے ساتھ گھر کی بالائی منزل پر تھا، مسلح افراد نے گھر میں ڈائیورز کو بھی ہراساں کیا۔
ترجمان تحریک انصاف نے بھی دعویٰ کیا تھا کہ مسلح افراد دروازے توڑ کر شاہ ریز کو بیڈ روم سے اغوا کرکے لے گئے، شاہ ریز خان کے 2 بچوں کے سامنے کمرے میں گھس کر تشدد کیا گیا۔
ادھر وزیراعظم کے سیاسی مشیر رانا ثنا اللہ نے کہا تھا کہ لاہور پولیس چیف نے گرفتاری کی تردید کی ہے۔
