راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے کوارٹر ماسٹر جنرل بنگلہ دیش آرمی لیفٹیننٹ جنرل محمد فیض الرحمٰن نے جوائنٹ اسٹاف ہیڈکوارٹرز راولپنڈی میں ملاقات کی۔
آئی ایس پی آر کے مطابق ملاقات کے دوران فریقین نے خطے کی سیکیورٹی صورتحال پر تبادلہ خیال کیا اور دفاع و سلامتی کے شعبے میں موجودہ تعاون کو مزید مضبوط بنانے کے عزم کا اعادہ کیا گیا۔
ملاقات کے دوران چیئرمین جوائنٹ چیفس آف اسٹاف کمیٹی نے پاکستان اور بنگلہ دیش کے درمیان بڑھتے ہوئے دو طرفہ تعلقات پر روشنی ڈالی اور دفاعی تعاون کے نئے امکانات پر گفتگو کی۔
آئی ایس پی آر کاکہناہے کہ معزز مہمان نے پاک افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کا اعتراف کیا۔
