اسلام آباد:گیٹس فاؤنڈیشن اور عالمی ادارہ صحت نے پاکستان میں مون سون بارشوں اور سیلاب سے متاثرہ علاقوں 33 ہائی رسک اضلاع میں 4 لاکھ 65 ہزار سے زائد افراد کو طبی امداد کی فراہمی کے لئے شراکت داری کی ہے۔
اس حوالے سے گیٹس فاؤنڈیشن کی جانب سے فراہم کی گئی ایک ملین امریکی ڈالر کی مالی معاونت، پاکستان کی وفاقی اور صوبائی حکومتوں کو ہنگامی طبی سہولیات کی فراہمی، بیماریوں کی نگرانی، ضروری ادویات کی دستیابی اور عوام میں آگاہی مہم کے ذریعے صحت سے متعلق اہم معلومات کی ترسیل میں مدد دے گی۔
یہ منصوبہ آئندہ چھ ماہ کے دوران نافذ کیا جائے گا، جس میں خاص توجہ حاملہ خواتین، پانچ سال سے کم عمر بچوں، بزرگوں، معذور افراد پر ہوگی ۔ڈبلیو ایچ او کی جانب سےخیبر پختونخوا میں سیلاب کے فوری بعد پندرہ ہزار مریضوں کے علاج کے لیے ادویات فراہم کی گئیں۔
ڈبلیو ایچ او نے پاکستان اور دیگر شراکت دار اداروں کے ساتھ مل کر 33 ترجیحی اضلاع میں 13 لاکھ متاثرین کو بھی ہنگامی طبی امداد فراہم کرنے کی تیاری مکمل کر لی ہے۔
