راولپنڈی:افغان حکومت کی بلااشتعال اور بزدلانہ جارحیت کے خلاف مادرِ وطن کا دفاع کرتے ہوئے جامِ شہادت نوش کرنے والے 12 جوانوں کی نمازِ جنازہ آج چکلالہ گیریژن راولپنڈی میں ادا کی گئی۔
آئی ایس پی آر کے مطابق نمازِ جنازہ میں چیف آف آرمی اسٹاف فیلڈ مارشل سید عاصم منیر ،وفاقی وزراء، گورنر خیبرپختونخوا، اعلیٰ عسکری و سول حکام اور عوام کی بڑی تعداد نے شرکت کی۔
اس موقع پر وزیرِ دفاع خواجہ محمدآصف نے کہا کہ پاکستان کے عوام ان شہداء کی عظیم قربانیوں کے ہمیشہ مقروض رہیں گے، جنہوں نے طالبان رجیم اور بھارت کی سرپرستی میں افغان سرزمین سے دہشت گردوں کی بزدلانہ اور غدارانہ جارحیت کے خلاف پاکستان کی سرحدی خودمختاری کا دفاع کرتے ہوئے اپنی جانیں نچھاور کیں۔
انہوں نے مزید کہا کہ پاکستان کی مسلح افواج قوم کی مکمل حمایت کے ساتھ ہر قسم کی جارحیت اور سازش کا ڈٹ کر مقابلہ کرنے کے لیے پُرعزم ہیں۔
