چمن:پاکستان کے خلاف افغان طالبان کی جانب سے جارحیت کے بعد بلوچستان کے چمن علاقے کے کاکڑ قبیلے کے عمائدین نے پاک فوج کے ساتھ بھرپور اظہارِ یکجہتی کیا اور سینہ سپر ہونے کا عزم ظاہر کیا۔ قبائلی عمائدین نے واضح کیا کہ وہ ملکی دفاع میں پاک فوج اور فرنٹیئر کور (ایف سی) کے شانہ بشانہ کھڑے ہیں اور کسی بھی بیرونی جارحیت کا سخت جواب دینے کے لیے تیار ہیں۔
عمائدین نے زور دے کر کہا کہ “کوئی ہمارے ملک کی جانب میلی آنکھ سے نہ دیکھے، ہم ہر کسی کو جواب دینا جانتے ہیں” اور اس بات کا اعادہ کیا کہ وہ پاکستان کے لیے ہر قربانی دینے کو تیار ہیں۔ انہوں نے کہا کہ یہ ملک، یہ وطن اور یہ مٹی ان کے لیے ماں جیسی ہے اور اس کی حفاظت ان کا اولین فرض ہے۔
کاکڑ قبیلے کے رہنماؤں نے کور کمانڈر اور آئی جی ایف سی سے درخواست کی کہ انہیں اس جنگ میں شامل ہونے کی اجازت دی جائے تاکہ وہ سرحدی دفاع میں مؤثر کردار ادا کر سکیں۔ عمائدین نے کہا کہ وہ مکمل طور پر چوکس اور تیار ہیں اور حکمرانوں کے ایک اشارے کے منتظر ہیں۔
قبیلے کے سینئر رہنماؤں نے اس عزم کا بھی اعادہ کیا کہ وہ کسی بھی حالت میں سرحدوں اور ملک کی سالمیت کا دفاع کریں گے اور پاک فوج کے ساتھ مل کر وطن کی حفاظت کو یقینی بنائیں گے۔
