اسلام آباد۔:پاکستان ہائی کمیشن نئی دہلی نے بھارت سے تعلق رکھنے والے 2100 سکھ یاتریوں کو بابا گرو نانک دیو جی کے جنم دن کی تقریبات میں شرکت کے لئے ویزے جاری کر دیئے۔پاکستان ہائی کمیشن نئی دہلی کے مطابق یہ تقریبات 4 سے 13 نومبر تک پاکستان میں منعقد ہوں گی۔
دورے کے دوران سکھ یاتری دیگر مقامات کے علاوہ گوردوارہ ننکانہ صاحب، گوردوارہ پنجہ صاحب اور گوردوارہ کرتار پور صاحب بھی جائیں گے۔اس موقع پر ناظم الامور سعد احمد وڑائچ نے سکھ یاتریوں کو دلی مبارکباد دی اور ان کے کیلئے نیک خواہشات کا اظہار کیا۔
انہوں نے کہا کہ حکومت پاکستان بین المذاہب اور بین الثقافتی ہم آہنگی و تفہیم کے فروغ کیلئے عزم ہے، مقدس مقامات کے دوروں میں سہولت فراہم کرتے رہیں گی۔ ویزوں کا اجراء مذہبی مقامات کے دوروں سے متعلق 1974ء کے دوطرفہ فریم ورک کے تحت کیا گیا ہے۔
