لاہور: تیسرے اور فیصلہ کن ٹی 20 میچ میں پاکستان نے ٹاس جیت کر فیلڈنگ کا فیصلہ کرلیا۔
میچ لاہور کے قذافی سٹیڈیم میں کھیلا جارہا ہے جو اپنے مقررہ وقت 8 بجے شروع ہوگا، میچ سے قبل گراؤنڈ میں ڈینگی سپرے بھی کیا گیا۔
قومی ٹیم کے کپتان سلمان علی آغا کا کہنا تھا کہ دوسرا میچ ہمارے لیے اہم تھا،دوسرے ٹی 20 میں ٹیم نے اچھا پرفارم کیا، ٹیم میں دو تبدیلیاں کی گئی ہیں، ابرار احمد اور نسیم شاہ کو آرام کرایا گیا جب کہ شاہین شاہ آفریدی اور عثمان طارق کو ٹیم میں شامل کیا گیا ہے۔جبکہ قومی کرکٹر عثمان طارق ٹی 20 میں ڈیبیو کر رہے ہیں۔
یاد رہے کہ ٹی 20 سیریز کے پہلے میچ میں مہمان جنوبی افریقہ نے پاکستان کو 55 رنز سے شکست دے تھی، راولپنڈی کرکٹ سٹیڈیم میں کھیلے گئے میچ میں پروٹیز ٹیم کے 195 رنز کے تعاقب میں پاکستان ٹیم 19ویں اوور میں 139رنز پر ڈھیر ہو گئی تھی۔
اِسی طرح لاہور میں جمعہ کو کھیلے گئے میچ میں قومی ٹیم نے جنوبی افریقہ کو 9 وکٹوں کے ہرا کر سیریز1-1برابر کرلی تھی۔
