ابوظہبی میں دنیا کا سب سے بڑا توانائی اجتماع شروع

ابوظہبی: ابو ظہبی میں دنیا کے سب سے بڑے توانائی کے اجتماع ایڈیپیک 2025 کا آغاز ابوظہبی نیشنل ایگزیبیشن سینٹر (ایڈینک) میں ہو گیا، جس میں عالمی توانائی شعبے کی سرکردہ شخصیات شریک ہیں۔ وام کے مطابق یہ چار روزہ تقریب 6 نومبر تک جاری رہے گی، جس میں مختلف ممالک کے وزراء، اعلیٰ حکام اور توانائی کے شعبے سے وابستہ اہم فیصلہ ساز شرکت کر رہے ہیں۔
ابوظہبی نیشنل آئل کمپنی (ادنوک) کے زیر اہتمام اس پروگرام میں دنیا بھر سے تقریباً دو لاکھ پانچ ہزار شرکاء کی آمد متوقع ہے جو 172 ممالک کی نمائندگی کر رہے ہیں۔ اس موقع پر 2,250 کمپنیاں اپنی مصنوعات اور خدمات کی نمائش کر رہی ہیں، جبکہ 1,800 مقررین صنعت، سرمایہ کاری، اختراع اور پالیسی سازی جیسے موضوعات پر اظہارِ خیال کریں گے۔
ایڈیپیک 2025 ایک بار پھر اس حقیقت کو اجاگر کر رہا ہے کہ ابوظہبی عالمی سطح پر توانائی، صنعت اور ٹیکنالوجی کے مستقبل کی تشکیل میں ایک مرکزی کردار ادا کر رہا ہے، جہاں مختلف شعبوں کے رہنما ایک پلیٹ فارم پر جمع ہو کر پائیدار ترقی کے اہداف کے حصول پر غور و خوض کر رہے ہیں۔