اسلام آباد:صدر آصف علی زرداری اور وزیراعظم محمد شہباز شریف نے ضلع شمالی وزیرستان اور ضلع ٹانک میں فتنہ الخوارج کے دہشت گردوں کے خلاف الگ الگ کامیاب کارروائیوں پر سیکیورٹی فورسز کو خراج تحسین پیش کیا ہے۔
اپنے بیان میں صدرآصف علی زرداری کہاکہ بھارتی حمایت یافتہ فتنہ الخوارج کو شکست دینا پاکستان کے امن و استحکام کے لئےضروری ہے۔ صدرِ مملکت نے کہاکہ دشمن کے ناپاک عزائم کو ناکام بنانے پر قوم کو اپنی افواج پر فخر ہے۔
انہوں نے کہاکہ پاکستان اپنے دفاع، خودمختاری اور سلامتی پر کوئی سمجھوتہ نہیں کرے گا۔ دہشت گردی کے مکمل خاتمے تک “عزمِ استحکام” کے تحت کارروائیاں جاری رہیں گی۔
اپنے بیان میں وزیراعظم شہبازشریف نےآپریشنز کے دوران 3 دہشت گردوں کو ہلاک کرنے پر سیکیورٹی فورسز کی پزیرائی کی اور کہاکہ دہشتگردی کے خلاف عزم استحکام میں پوری قوم سیکیورٹی فورسز کے ساتھ کھڑی ہے۔ہم ملک سے ہر قسم کی دہشت گردی کے مکمل خاتمے کے لئے پر عزم ہیں۔
