راولپنڈ ی:برطانوی چیف آف جنرل اسٹاف جنرل سر چارلز رولینڈ ونسنٹ واکر نے جنرل ہیڈ کوارٹرز (جی ایچ کیو) کا دورہ کیا اور آرمی چیف فیلڈ مارشل سید عاصم منیر سے ملاقات کی۔ملاقات میں باہمی دلچسپی کے امور، علاقائی سلامتی اور دوطرفہ دفاعی تعاون کو مزید وسعت دینے کے اقدامات پر تبادلہ خیال کیا گیا۔
آئی ایس پی آر کے مطابق ملاقات کے دوران دونوں جانب سے خطے میں امن و استحکام کو یقینی بنانے کے لئے تعاون جاری رکھنے کی ضرورت پر زور دیا گیا، برطانوی چیف آف جنرل اسٹاف نے دہشت گردی کے خلاف جنگ میں پاک فوج کی کامیابیوں اور قربانیوں کا اعتراف کیا اور علاقائی امن و استحکام کے لئے پاک فوج کی کوششوں کو سراہا۔
قبل ازیں جی ایچ کیو آمد پر برطانوی چیف آف جنرل اسٹاف نے یاد گار شہداء پر حاضری دی۔ شہداء کو خراج عقیدت پیش کیا جبکہ پاک فوج کے چاق و چوبند دستے نے انہیں گارڈ آف آنر پیش کیا۔
