اسلام آباد:ستائیسویں آئینی ترمیم کے 80 فیصد نکات پر مشاورت مکمل ہو چکی ،20فیصد مسودے پر کل مشاورت مکمل کر لیں گے ۔ان کیمرہ اجلاس کے بعد میڈیا سے گفتگو کرتے ہوئے چئیرمین کمیٹی فاروق ایچ نائیک نے کہا کہ معاملے پر اتفاق رائے سے قانون سازی کرنا چاہتےہیں ۔
ستائیسویں آئینی ترمیم پر مشاورت کے لیے تشکیل دی جانے والی قانون اور انصاف کی قائمہ کمیٹی کا ان کیمرہ اجلاس پارلیمنٹ ہاوس کے کانسٹیٹیوشن روم نمبر 5 میں ہوا جس میں ایوان زیریں اور ایوان بالا کے مخصوص ارکان نے شرکت کی ۔ اجلا س میں تمام پارلیمانی جماعتوں کے ارکان نے وڈیو لنک سے بھی شریک ہوئے ۔
اجلاس کے بعد میڈیا سے گفتگو کرتے ہوئے چئیرمین کمیٹی فاروق ایچ نائیک نے کہا کہ آج کے اجلاس میں آئین کے آرٹیکل 175 تک مشاورت ہوئی ہے جس کا تعلق آئینی عدالت کے قیام اور اختیارات سے ہے ۔
وفاقی وزیر قانون اعظم نذیر تارڑ کا کہنا تھا کہ اجلاس میں شرکت کے لئے تمام سیاسی جماعتوں کو دعوت دی ہے ، اتفاق رائے ہونے تک مشاورت جاری رہے گی۔
قانون و انصاف کی مشترکہ قائمہ کمیٹی کا اجلاس کل دن 11:30بجے دوبارہ ہو گاجس میں آئینی ترمیم کے مسودے پر مشاورت کی جائے گی ۔
