راولپنڈی :پاکستان اور سعودی عرب کے درمیان مشترکہ فوجی مشق البطار دوم کی پروقار اختتامی تقریب سعودی عرب کے شہر تبوک میں ہوئی ۔ یہ مشقیں اٹھارہ سے چھبیس نومبر تک جاری رہیں جن میں پاک فوج کے سپیشل سروسز گروپ کا دستہ اور سعودی فوج کی کمبیٹ ٹیموں نے حصہ لیا۔
آئی ایس پی آر کے مطابق اختتامی تقریب میں سپیشل سروسز گروپ کے جنرل آفیسر کمانڈنگ نے پاکستان کی جانب سے بطور مہمان خصوصی شرکت کی ۔ تقریب میں دونوں برادر ملکوں کے فوجی دستوں نے پیشہ ورانہ صلاحیت ، آپریشنل مہارت اور باہمی ہم آہنگی کے شاندار معیار کا مظاہرہ کیا۔
آئی ایس پی آر کاکہناہے کہ البطار دوم مشترکہ مشق کا مقصد دہشت گردی کے خلاف آپریشن میں مشترکہ مہارت کو بڑھانا تھا ۔ خاص طور پر آبادی والے علاقوں میں انسداد دہشت گردی کے آپریشنز ، خودکار دھماکہ خیز آلات ناکارہ بنانااور مربوط تربیت کے ذریعے فوجی ڈرلز اور طریقہ کار بہتر بنانا تھا۔ اس مشترکہ مشق سے دونوں برادر ملکوں کے درمیان گہرے تاریخی فوجی تعلقات مزید مضبوط ہوئے ہیں ۔
