اسلام آباد:وفاقی وزیر داخلہ محسن نقوی سے برطانوی ہائی کمشنر جین میریٹ نےملاقات کی، جس میں پاک برطانیہ تعلقات، سیکورٹی تعاون اور باہمی دلچسپی کے اُمور پر تفصیلی بات چیت کی گئی۔
ملاقات میں برطانیہ میں غیر قانونی طور پر مقیم پاکستانی شہریوں کی وطن واپسی کے اُمور بھی زیرِ بحث آئے۔ وزیر داخلہ نے کہا کہ شہزاد اکبر اور عادل راجہ پاکستان میں مطلوب ہیں اور ان کو فوری طور پر وطن واپس بھیجا جائے۔ حکومت پاکستان کی طرف سے EXTRADITION کے کاغذات متعلقہ حکام کو فراہم کر دیے گئے ہیں اور وزارت داخلہ نے وزارت خارجہ کے ذریعے EXTRADITION کے عمل کا آغاز کر دیا ہے۔
محسن نقوی نے کہا کہ وہ آزادی اظہار پر پورا یقین رکھتے ہیں لیکن فیک نیوز ہر ملک کے لیے مسئلہ ہے، اور بیرون ملک بیٹھ کر ریاست اور اداروں کے خلاف ہرزہ سرائی اور بہتان کی کسی بھی ملک میں اجازت نہیں دی جا سکتی۔ وزیر داخلہ نے کہا کہ پاکستان مخالف پروپیگنڈا کرنے والوں کی واپسی میں برطانیہ کے تعاون کا خیر مقدم کریں گے۔
اس موقع پر وفاقی سیکرٹری داخلہ محمد خرم آغا اور دیگر متعلقہ افسران بھی موجود تھے۔
