گلگت بلتستان میں الیکشن ملتوی، نئی تاریخ بعد میں اعلان کی جائے گی

گلگت: گلگت بلتستان میں 24 جنوری 2026 کو ہونے والے انتخابات کو چیف الیکشن کمشنر راجا شہباز خان نے ملتوی کر دیا ہے۔
یہ اعلان آل پارٹیز کانفرنس (اے پی سی) میں باہمی مشاورت اور اکثریتی رائے کے بعد کیا گیا۔ اے پی سی میں گلگت بلتستان کی سیاسی اور مذہبی جماعتوں کے نمائندے بڑی تعداد میں شریک ہوئے، جہاں 6 جماعتوں نے الیکشن کے انعقاد کی حمایت کی جبکہ 13 جماعتوں نے الیکشن ملتوی کرنے پر زور دیا۔

چیف الیکشن کمشنر نے کہا کہ میرے پاس الیکشن ملتوی کرنے کے لیے 14 پٹیشنز موصول ہوئی ہیں اور 17 لاکھ عوام کے چیف الیکشن کمشنر کی حیثیت سے سب مقدم اور برابر ہیں۔

انہوں نے مزید کہا کہ جنرل الیکشن کی نئی تاریخ بعد میں اعلان کی جائے گی۔الیکشن شدید موسمی صورتحال کے پیش نظر ملتوی کئے گئے ہیں ۔