اسلام آباد:وزیراعظم محمد شہباز شریف نے قطر کے قومی دن کے موقع پر امیرقطر شیخ تمیم بن حمد الثانی سے ٹیلیفونک رابطہ کیا ہے۔ وزیر اعظم نے امیرقطر، شاہی خاندان، حکومت اورقطر کے برادر عوام کوقومی دن کے موقع پر دلی مبارکباد پیش کی اور امن، ترقی اور خوشحالی کے لیے نیک خواہشات کا اظہار کیا۔
وزیر اعظم نے امیرقطر کی دور اندیش قیادت میں شاندار کامیابیوں اور عالمی سطح پر اس کی بڑھتی ہوئی اہمیت کی تعریف کی۔ انہوں نے دونوں برادر ممالک کے درمیان دیرینہ اور کثیر جہتی دوطرفہ شراکت داری کو مزید مضبوط بنانے کے لیے پاکستان کے پختہ عزم کا اعادہ کیا۔
گفتگو کے دوران وزیراعظم نے غزہ میں قیام امن کی کوششوں میں قطر کے قابل قدر کردار کو سراہا اورپاکستان اور افغانستان کے درمیان کشیدگی کم کرنے کے لیے قطر کی جانب سے مذاکرات میں سہولت کاری کی تعریف کی۔
امیر قطرشیخ تمیم بن حمد الثانی نے وزیراعظم کا شکریہ ادا کیا اور مستقبل میں دونوں ممالک کے درمیان تاریخی، گہرے اور برادرانہ تعلقات کو مزید مضبوط کرنے کے لئے اپنے پختہ عزم کا اظہار کیا۔
وزیر اعظم نے امیر قطر کو پاکستان کا سرکاری دورہ کرنے کی اپنی دعوت کا اعادہ کیا۔
