لاہور: وفاقی وزیرداخلہ محسن نقوی اور وزیرمملکت داخلہ طلال چوہدری نے لاہور ائرپورٹ کا دورہ کیا۔ وزراء نے بیرونِ ممالک جانے والے مسافروں کے امیگریشن پراسیس کا جائزہ لیا اور امیگریشن کاؤنٹرز پر جا کر عمل کا مشاہدہ کیا۔
محسن نقوی بیرونِ ملک جانے والے مسافروں سے بھی ملے اور امیگریشن کے عمل کے بارے میں دریافت کیا۔ اس موقع پر وزیرداخلہ نے امیگریشن کاؤنٹر پر تعینات ایف آئی اے اہلکار کو اچھی کارکردگی پر شاباش دی اور حوصلہ افزائی کی۔
ایک مسافر کی چیکنگ میں تاخیر کے باعث بورڈنگ بند ہونے کی شکایت سامنے آئی جس پر وزیر داخلہ نے متعلقہ حکام کو کویت جانے والے مسافر کی فوری بورڈنگ کرانے کے احکامات دیے۔
مسافروں نے گفتگو کرتے ہوئے بتایا کہ چند منٹ میں امیگریشن کا عمل مکمل ہو رہا ہے۔ اس موقع پر محسن نقوی نے کہا کہ پاکستان کی عزت اور مسافروں کی سہولت سب سے زیادہ عزیز ہے اور کسی بھی مسافر کو بلاجواز سفر سے نہیں روکا جائے گا۔
وزیرداخلہ نے واضح کیا کہ پیشہ ور بھکاریوں یا نامکمل دستاویزات رکھنے والوں کو سفر کی اجازت نہیں دی جا سکتی اور پاکستان کی بدنامی کا باعث بننے والوں کی جگہ جیل ہے۔دورے کے موقع پر ریجنل ڈائریکٹر ایف آئی اے لاہور علی ضیاء اور ڈپٹی ڈائریکٹر ائرپورٹ اویس بھی موجود تھے۔
