9 مئی کیسز: بانی پی ٹی آئی اور بشریٰ بی بی کو 27 جنوری تک گرفتار نہ کرنے کا حکم

اسلام آباد: ڈسٹرکٹ اینڈ سیشن کورٹس اسلام آباد نے 9 مئی سمیت دیگر پانچ مقدمات میں بانی پی ٹی آئی عمران خان کی گرفتاری سے روک دیا جبکہ بانی پی ٹی آئی اور بشریٰ بی بی کی ضمانت قبل از گرفتاری میں بھی توسیع کر دی گئی ہے۔
ایڈیشنل ڈسٹرکٹ اینڈ سیشن جج محمد افضل مجوکہ نے مقدمات پر سماعت کی، عدالت نے حکم دیا کہ بانی پی ٹی آئی اور بشریٰ بی بی کو 27 جنوری تک ان مقدمات میں گرفتار نہ کیا جائے۔
عدالت نے آئندہ سماعت پر بانی پی ٹی آئی کو عدالت میں یا بذریعہ ویڈیو لنک پیش ہونے کی ہدایت بھی جاری کی، بانی پی ٹی آئی کی عدم دستیابی کے باعث ضمانت کی درخواستوں پر دلائل نہیں ہو سکے جس کے بعد عدالت نے سماعت 27 جنوری تک ملتوی کر دی۔
سماعت کے دوران بانی پی ٹی آئی اور بشریٰ بی بی کی جانب سے شمسہ کیانی ایڈووکیٹ عدالت میں پیش ہوئیں، بانی پی ٹی آئی کے خلاف 9 مئی، اقدامِ قتل، جعلی رسیدوں سمیت مختلف مقدمات درج ہیں جبکہ بشریٰ بی بی کے خلاف مبینہ جعلی رسیدیں جمع کروانے کے الزام میں مقدمہ زیرِ سماعت ہے۔