اسلام آباد: امریکی جریدے یو ایس اے ٹو ڈے کے مطابق پاکستان کی معیشت تیزی سے ترقی کی راہ پر گامزن ہے اور حکومت کی اصلاحاتی پالیسیوں کے نتیجے میں ملکی اور غیر ملکی سرمایہ کاروں کا اعتماد بڑھ رہا ہے۔ جریدے نے کہا کہ پاکستان نئی بنیادوں پر ترقی کی راہ پر گامزن ہے اور بہترین اصلاحات کے ساتھ نجی شعبے میں جدت نے سرمایہ کاری کے منظرنامے کو بدل دیا ہے۔
یو ایس اے ٹو ڈے نے مزید بتایا کہ پاکستان مستحکم ادارہ جاتی نظم و ضبط، بہتر میکرو اکنامک صورتحال اور اہم شعبوں میں مضبوط قیادت کے ساتھ 2026 میں داخل ہو رہا ہے، جو ملک کو طویل مدتی سرمایہ کاری کے لیے مضبوط اور مواقع سے بھرپور مارکیٹ کے طور پر پیش کر رہا ہے۔
بینکنگ کے شعبے نے ڈیجیٹل رجحان کے تحت صارفین کو جدید سہولیات فراہم کی ہیں جبکہ ٹیکنالوجی اور آؤٹ سورسنگ کے شعبے نے بھی بین الاقوامی سطح پر شہرت حاصل کی ہے۔ یو ایس اے ٹو ڈے کے مطابق یہ تمام اقدامات سرمایہ کاروں کے اعتماد کا اہم ستون ہیں۔
مستحکم توانائی کی فراہمی مینوفیکچرنگ، لاجسٹکس اور برآمداتی خدمات میں نئے مواقع پیدا کر رہی ہے، اور میکرو اکنامک استحکام کے بہتر ہونے سے بڑے مینوفیکچررز آٹوموٹیو صنعت میں سرمایہ کاری کر رہے ہیں۔ ٹیکسٹائل، فرٹیلائزر، پیکجنگ اور ویلیو ایڈڈ فوڈ پروڈکشن جیسے تیزی سے بڑھتے شعبوں میں بھی ترقی دیکھنے میں آئی ہے۔
پاکستان میں معدنیات کا شعبہ تیزی سے ترقی کر رہا ہے، جبکہ ہاؤسنگ مارکیٹ بھی اندرونی و بیرونی سرمایہ کاروں کی دلچسپی بڑھا رہی ہے۔ سیاحت اور ہوٹلنگ میں اہم مواقع سامنے آ رہے ہیں، اور نجی شعبے کے ساتھ طویل مدتی ترقی کی بنیادیں مضبوط کی جا رہی ہیں۔
یو ایس اے ٹو ڈے کے مطابق نجی شعبہ زیادہ مضبوط، ٹیکنالوجی سے بھرپور اور عالمی دنیا سے ہم آہنگ ہو رہا ہے، جو پاکستان میں سرمایہ کاری اور اقتصادی ترقی کے روشن امکانات کی عکاسی کرتا ہے۔
