اسلام آباد: پاکستان انٹرنیشنل ایئرلائنز (پی آئی اے) نے کینیڈا اور برطانیہ کی ریل سروسز کے ساتھ ایک تاریخی اشتراک کا اعلان کر دیا ہے جس کے تحت مسافروں کو ایک ہی ٹکٹ پر ہوائی اور ٹرین کے سفر کی سہولت فراہم کی جا رہی ہے۔
ترجمان پی آئی اے کے مطابق پی آئی اے کی پروازوں کے ذریعے ٹورنٹو پہنچنے والے مسافر وہاں کی پارٹنر ایسیس ریل سروس کے ذریعے کینیڈا کے 8 اہم شہروں تک اپنا سفر بآسانی جاری رکھ سکیں گے۔
اسی طرح پی آئی اے کے ذریعے برطانیہ کے شہروں مانچسٹر اور لندن جانے والے مسافر ایسیس ریل سروس کے ذریعے 50 سے زائد شہروں تک رسائی حاصل کر سکیں گے۔
پی آئی اے کے مسافر اپنی منزل مقصود تک کے ٹکٹ پی آئی اے کے تمام بکنگ دفاتر اور رجسٹرڈ ٹریول ایجنٹس سے حاصل کر سکتے ہیں۔
اس کے علاوہ ٹکٹ کی بکنگ پی آئی اے کی باضابطہ ویب سائٹ اور پی آئی اے کی موبائل ایپلیکیشن کے ذریعے بھی کی جا سکتی ہے۔
معاہدے کا بنیادی مقصد مسافروں کو ان کے گھر کی دہلیز تک بہترین، مربوط اور سہل سفری سہولت فراہم کرنا ہے۔
اس نئی سہولت کے آغاز سے مسافروں کے وقت کی نمایاں بچت ہوگی اور سفر مزید آرام دہ ہو جائے گا۔
ایئر ٹو ریل اشتراک پی آئی اے کے نیٹ ورک کو ڈیجیٹل اور جدید خطوط پر استوار کرنے کی جانب ایک اہم اور بڑا قدم قرار دیا جا رہا ہے۔
