اسلام آباد:پاکستان انجینئرنگ کونسل(پی ای سی) اور انرجی چائنا نےپاکستانی انجینئرز کو عالمی میگا منصوبوں میں شامل کرنے کے لیے اسٹریٹیجک شراکت داری پر اتفاق کرلیا۔اس سلسلے میں پاکستان انجینئرنگ کونسل اور چائنا انرجی انٹرنیشنل گروپ کمپنی لمیٹڈ – پاکستان برانچ کے درمیان اسلام آباد میں اہم مفاہمتی یادداشت پر دستخط کیے گئے۔
انرجی چائنا کے منیجنگ ڈائریکٹر مسٹر وانگ ہوئی ہوا نے کہا کہ انرجی چائنا پاکستانی انجینئرز کو اپنے منصوبوں میں شامل کرنے اور مقامی کنٹریکٹرز کے ساتھ مؤثر شراکت داری قائم کرنے کے لیے پُرعزم ہے۔
چیئرمین پی ای سی، انجینئر وسیم نذیر نے اس ایم او یو کو پاکستان کے انجینئرنگ شعبے کے لیے اہم سنگِ میل قرار دیتے ہوئے پی ای سی میں چائنا ڈیسک کے قیام کا اعلان کیا، تاکہ چینی سرکاری اداروں کے ساتھ مسلسل رابطہ، مربوط تقرری کے عمل اور صلاحیت پر مبنی تعاون کو یقینی بنایا جا سکے۔
اس ایم او یو کے تحت پی ای سی میں رجسٹرڈ پاکستانی انجینئرز کو انرجی چائنا کے میگا انفراسٹرکچر، پاور، قابلِ تجدید توانائی، ہائیڈرو پاور، ٹرانسمیشن، ٹرانسپورٹ اور سرمایہ کاری کے منصوبوں میں جنوب مشرقی ایشیا، مشرقِ وسطیٰ، افریقہ اور یورپ میں باقاعدہ طور پر شامل کیا جائے گا، جس سے پاکستانی انجینئرنگ ورک فورس کے لیے براہِ راست عالمی روزگار اور مہارتوں کی منتقلی کے مواقع پیدا ہوں گے۔
