اسلام آباد: پاکستان میں کاروباری سرگرمیوں اور کارپوریٹ رجسٹریشن میں نمایاں اضافہ دیکھنے میں آیا ہے جس کی بڑی وجہ اسپیشل انویسٹمنٹ فسیلیٹیشن کونسل (ایس آئی ایف سی) کی پالیسیوں کو قرار دیا جا رہا ہے۔
سیکیورٹیز اینڈ ایکسچینج کمیشن آف پاکستان کے مطابق فروری کے دوران ملک میں 3 ہزار 444 نئی کمپنیوں کا اندراج کیا گیا۔ نئی کمپنیوں کے قیام کے بعد پاکستان میں رجسٹرڈ کمپنیوں کی مجموعی تعداد بڑھ کر 2 لاکھ 87 ہزار 49 ہو گئی ہے۔
رپورٹ کے مطابق 82 نئی کمپنیوں میں غیر ملکی سرمایہ کار بھی شامل ہیں، جن میں چین اور امریکا کے سرمایہ کار نمایاں رہے۔ عالمی سرمایہ کاروں کی توجہ بالخصوص معدنیات، تجارت اور آئی ٹی کے شعبوں پر مرکوز رہی، جو پاکستان کے قدرتی وسائل اور ابھرتی ہوئی ڈیجیٹل معیشت کی اہمیت کو ظاہر کرتی ہے۔
مشیر وزیر خزانہ خرم شہزاد کے مطابق گزشتہ 15 مہینوں کے دوران بی وائی ڈی، گوگل، آرامکو اور دیگر بڑی عالمی کمپنیوں سمیت 19 کمپنیوں نے پاکستان میں سرمایہ کاری کے لیے قدم رکھا ہے۔
ماہرین کے مطابق نئی کمپنیوں کی رجسٹریشن میں مسلسل اضافہ ملک میں بہتر ہوتے کاروباری ماحول اور سرمایہ کاروں کے بڑھتے اعتماد کی واضح علامت ہے۔ حکام کا کہنا ہے کہ ایس آئی ایف سی کی مؤثر سہولت کاری پاکستان میں پائیدار معاشی ترقی اور کاروباری مواقع کے فروغ میں اہم کردار ادا کر رہی ہے۔
