اسلام آباد:سینیٹ سیکریٹریٹ نے وفاقی حکومت کی پالیسی کے مطابق کفایت شعاری اور توانائی بچت اقدامات کا باضابطہ اعلان کر دیا ہے۔ یہ اقدامات چئیرمین سینیٹ سید یوسف رضا گیلانی کی ہدایات میں حتمی شکل دیے گئے، اس حوالے سے ایوان بالا کی جانب سے باقاعدہ نوٹیفکیشن بھی جاری کر دیا گیا ہے۔
نوٹیفکیشن کے مطابق سینیٹ سیکریٹریٹ میں چار روزہ ورکنگ ویک نافذ کیا جائے گا، جس کے تحت پچاس فیصد ملازمین دفتر سے جبکہ باقی پچاس فیصد ملازمین گھروں سے کام کریں گے۔ اس اقدام کا مقصد توانائی کے استعمال اور انتظامی اخراجات میں نمایاں کمی لانا ہے۔
سینیٹ سیکریٹریٹ نے بجلی کے استعمال اور ٹرانسپورٹ اخراجات میں تقریباً ستر فیصد کمی کا ہدف بھی مقرر کیا ہے۔ اسی طرح قائمہ کمیٹیوں کے بیشتر اجلاس آن لائن ہونگے تاکہ اخراجات میں مزید کمی لائی جا سکے۔
اعلامیے کے مطابق قومی یکجہتی کے اظہار کے طور پر سینیٹرز نے دو ماہ کے لیے اپنی تنخواہوں اور مراعات میں پچیس فیصد کمی کا فیصلہ کیا ہے، جبکہ گریڈ 20 اور اس سے اوپر کے افسران کفایت شعاری مہم کے لیے دو دن کی تنخواہ دیں گے۔
مالی سال 2025-26 کی آخری سہ ماہی کے دوران نان ای آر ای بجٹ میں بیس فیصد کمی کا فیصلہ کیا گیا ہے۔ نوٹیفکیشن کے مطابق غیر ضروری خریداریوں پر فوری پابندی عائد کر دی گئی ہے اور صرف ناگزیر اخراجات کی اجازت ہوگی، جبکہ سرکاری ضیافتیں اور استقبالیے عارضی طور پر معطل کر دیے گئے ہیں۔
