اسلام آباد:یومِ پاکستان کے موقع پر ملک کے مختلف صوبوں سے تعلق رکھنے والے نوجوانوں نے قوم کے نام خصوصی پیغامات جاری کرتے ہوئے وطن سے اپنی گہری محبت اور وابستگی کا اظہار کیا ہے۔
نوجوانوں کا کہنا تھا کہ 23 مارچ برصغیر کے مسلمانوں کی جدوجہد اور ایک آزاد وطن کے خواب کی تعبیر کی یاد دلاتا ہے۔ اس دن کی اہمیت ہمیں اتحاد، ایمان اور یقین کے ساتھ آگے بڑھنے کا درس دیتی ہے۔
اپنے پیغامات میں نوجوانوں نے کہا کہ ہم اس دھرتی سے ہیں جہاں کھیت سنہرے ہوتے ہیں اور وطن سے محبت خوشبو بن کر فصلوں میں مہکتی ہے۔ ہم اس سرزمین سے ہیں جہاں دریا تاریخ سناتے ہیں اور ثقافت وقت کے ساتھ بہتی ہے۔
انہوں نے مزید کہا کہ ہم اس وسعت سے ہیں جہاں ہمارے حوصلے، ارادے اور وعدے چٹان کی طرح مضبوط ہوتے ہیں، جبکہ ہم ان پہاڑوں سے ہیں جہاں غیرت، مہمان نوازی اور عزم ہماری روایت کا حصہ ہیں۔
نوجوانوں کا کہنا تھا کہ ہم ان بلندیوں سے ہیں جہاں برف پر بھی امید اگتی ہے اور راستے ہمت میں بدل جاتے ہیں۔ ہم ان وادیوں سے ہیں جہاں ہر منظر وطن سے محبت کا اظہار کرتا ہے اور ہر جھرنا اس کی بقاء کے گیت گاتا ہے۔
آخر میں نوجوانوں نے اس عزم کا اظہار کیا کہ 23 مارچ ہمیں یاد دلاتا ہے کہ ہماری بولیاں مختلف ہو سکتی ہیں، ہماری ثقافت جدا ہو سکتی ہے، مگر ہماری پہچان، ہمارا یقین اور ہمارا پاکستان ایک ہے۔
