اسلام آباد: نیشنل ڈیزاسٹر مینجمنٹ اتھارٹی (NDMA) کے نیشنل ایمرجنسیز آپریشن سینٹر نے آئندہ 12 سے 24 گھنٹوں کے دوران ملک کے مختلف علاقوں میں گرج چمک کے ساتھ بارش اور ژالہ باری کا الرٹ جاری کر دیا ہے۔
محکمہ کے مطابق موجودہ موسمی صورتحال پہلے سے جاری کیے گئے موسمی جائزوں کے مطابق ہے، جبکہ اپریل سے جون کے دوران غیر معمولی بارشوں اور موسمی تبدیلیوں کی پیش گوئی پہلے ہی کی جا چکی تھی۔
کن علاقوں میں بارش کا امکان؟
الرٹ کے مطابق پنجاب، خیبر پختونخوا، آزاد کشمیر اور گلگت بلتستان کے مختلف علاقوں میں بارش اور تیز ہواؤں کا امکان ہے۔
پنجاب کے جن اضلاع میں بارش متوقع ہے ان میں اسلام آباد، راولپنڈی، لاہور، سیالکوٹ، گوجرانوالہ، سرگودھا، ملتان، فیصل آباد، چکوال، جہلم اور دیگر علاقے شامل ہیں۔
اسی طرح آزاد کشمیر کے مظفرآباد، نیلم ویلی، راولا کوٹ، باغ، کوٹلی اور گلگت بلتستان کے مختلف علاقوں میں بھی بارش کی پیشگوئی کی گئی ہے۔
خیبر پختونخوا کے چترال، سوات، دیر، پشاور، مانسہرہ، ایبٹ آباد، کوہاٹ، بنوں اور دیگر اضلاع میں بھی گرج چمک کے ساتھ بارش کا امکان ہے۔
احتیاطی تدابیر
NDMA نے خبردار کیا ہے کہ موسلا دھار بارش اور ژالہ باری کے باعث نشیبی علاقے، کمزور تعمیرات، سولر پینلز اور گاڑیوں کو نقصان پہنچ سکتا ہے۔
مزید کہا گیا ہے کہ گلیشیئرز کے پگھلنے سے سیلابی ریلوں، گلیشیائی جھیل پھٹنے اور لینڈ سلائیڈنگ کا خدشہ موجود ہے، خصوصاً پہاڑی علاقوں میں سفر کے دوران احتیاط برتی جائے۔
اہم ہدایات:
- غیر ضروری سفر سے گریز کیا جائے
- پہاڑی علاقوں میں احتیاط لازم
- نشیبی علاقوں میں رہائش پذیر افراد الرٹ رہیں
- تیز ہواؤں اور ژالہ باری سے بچاؤ کے اقدامات کیے جائیں
یہ الرٹ شہریوں کو ممکنہ موسمی خطرات سے بروقت آگاہ کرنے کے لیے جاری کیا گیا ہے۔
