اسلام آباد:وفاقی وزارت موسمیاتی تبدیلی و ماحولیاتی رابطہ نے ملک بھر کے نوجوانوں کے لیے "نیشنل کانٹینٹ کمپٹیشن 2025” کے انعقاد کا اعلان کر دیا۔ یہ مقابلہ پاکستان کے نوجوانوں کو موسمیاتی تبدیلی، قدرتی ماحول اور سبز پاکستان جیسے اہم موضوعات پر اپنی آواز بلند کرنے کا ایک منفرد موقع فراہم کرتا ہے۔
ترجمان وزارت کے مطابق اس مقابلے کا مقصد نوجوانوں کو ماحول دوست پیغامات تخلیقی انداز میں عوام تک پہنچانے کے لیے ایک مؤثر پلیٹ فارم فراہم کرنا ہے۔ نوجوان اپنی تخلیقات شارٹ ویڈیوز، انسٹاگرام رییلز، فوٹو ایسیز، یا سوشل میڈیا پوسٹس کی شکل میں جمع کروا سکتے ہیں۔
وزارت کا کہنا ہے کہ اس قومی مقابلے کے ذریعے نہ صرف نوجوانوں میں ماحولیاتی شعور بیدار ہوگا بلکہ ماحول کے تحفظ کے لیے اجتماعی آگاہی بھی بڑھے گی۔ اس اقدام سے سبز پاکستان کے وژن کو تقویت ملے گی اور عوام میں قدرتی وسائل کے تحفظ کا احساس اجاگر کیا جائے گا۔
مقابلے میں شرکت کے لیے نئی آخری تاریخ 1 جولائی 2025 مقرر کی گئی ہے۔ تمام اندراجات DIGITALMEDIA@MOCC.GOV.PK پر ای میل کے ذریعے جمع کرائی جا سکتی ہیں۔
وفاقی وزارت نے تمام نوجوانوں سے اپیل کی ہے کہ وہ اس مہم میں بھرپور حصہ لیں اور ماحولیاتی تحفظ کے لیے اپنی تخلیقی صلاحیتوں کو بروئے کار لائیں تاکہ پاکستان کو ایک صاف، سرسبز اور محفوظ ملک بنایا جا سکے۔
