یکم نومبرکے بعد نان فائلرز کے خلاف کارروائیاں شروع ہوں گی، ایف بی آر

اسلام آباد: چیئرمین فیڈرل بورڈ آف ریونیو (ایف بی آر) راشد لنگڑیال نے خبردار کیا ہے کہ نان فائلرز کے خلاف کارروائیاں یکم نومبر کے بعد سے شروع ہوں گی۔

اسلام آباد میں میڈیا سے گفتگو میں راشد لنگڑیال کا کہنا تھا کہ انکم ٹیکس گوشوارے کی تعداد 40 لاکھ سے زیادہ ہوچکی، گوشواروں کی تعداد گزشتہ سال سے دگنی ہو چکی ہے۔

انہوں نے کہا کہ انکم ٹیکس گوشوارے جمع کرانے کی آخری تاریخ میں توسیع نہیں ہوگی، چیئرمین ایف بی آر نے خبردار کیا کہ نان فائلر کے خلاف بڑے پیمانے پر کارروائیوں کا آغاز نومبر سے ہوگا، نان فائلر کا پورا ڈیٹا موجود ہے۔

ان کا کہنا تھا کہ وزیر اعظم کی ہدایت ہے کہ ٹیکس چور کو نہیں چھوڑنا ہے، واضح رہے کہ انکم ٹیکس گوشوارے جمع کرانے کی آخری تاریخ 14 اکتوبر ہے۔

خیال رہے کہ فیڈرل بورڈ آف ریونیو (ایف بی آر) نے نان فائلرز کی کیٹیگری ختم کرکے ٹیکس نہ دینے والوں پر15پابندیاں لگانے کا فیصلہ کیا ہے۔ ان میں سے پانچ پابندیاں ابتدائی طور پر لگائی جائیں گی جن میں جائیداد کی خریدوفروخت، گاڑیوں، بین الاقوامی سفر ، کرنٹ اکاؤنٹ کھولنے اور میوچل فنڈز میں سرمایہ کاری پرپابندیاں شامل ہیں۔