دبئی: ایشیا کپ ٹی ٹوئنٹی ٹورنامنٹ کا سب سے بڑا مقابلہ آج کھیلا جائے گا، جہاں پاکستان اور بھارت آمنے سامنے ہوں گے۔ گروپ اے کے اس ہائی وولٹیج میچ میں دونوں ٹیمیں دبئی انٹرنیشنل اسٹیڈیم میں ٹکرائیں گی۔
یہ گزشتہ 6 ماہ میں دوسرا موقع ہے جب دونوں حریف ٹیمیں آمنے سامنے ہوں گی۔ اس سے قبل وہ چیمپئنز ٹرافی میں ایک دوسرے کے مدمقابل آئے تھے۔
ایشیا کپ کے ابتدائی میچوں میں بھارت نے متحدہ عرب امارات کو 9 وکٹوں سے شکست دی جبکہ پاکستان نے عمان کو مات دی۔ اب دونوں ٹیمیں ایونٹ کے سب سے دلچسپ میچ میں مدمقابل ہوں گی۔
ریکارڈ کے مطابق بھارت نے اب تک ایشیا کپ کے 19 میچوں میں سے 10 میں کامیابی حاصل کی، جبکہ پاکستان نے 6 میں فتح حاصل کی ہے۔ پاکستان کی بھارت کے خلاف ایشیا کپ میں آخری فتح 2022 میں آئی تھی۔ بھارت 8 بار ایشیا کپ کا چیمپئن بن چکا ہے، جبکہ پاکستان نے یہ اعزاز 2 مرتبہ اپنے نام کیا ہے۔
پاکستانی شائقین پرامید ہیں کہ گرین شرٹس آج کے میچ میں بہترین کارکردگی دکھائیں گے۔ پاک بھارت ٹاکرا پاکستانی وقت کے مطابق شام 7:30 بجے شروع ہوگا۔
