دونوں ممالک سے گزارش ہے کرتارپور کی طرح دیگر مقامات کی بھی یاترا کرائیں، سکھ یاتری

ننکانہ صاحب: بھارت سے آئے سکھ یاتریوں نے دونوں ممالک سے گزارش کرتے ہوئے کہا کہ کرتارپور کی طرح دیگر مقامات کی بھی یاترا کرائی جائے۔

بھارت سے آئے یاتریوں کے جتھہ دار سردار خوشویندر سنگھ نے نجی ٹی وی سے خصوصی گفتگو کرتے ہوئے کہا کہ حکومت پاکستان اور پنجاب پولیس کی طرف سے بہترین انتظامات کئے گئے ہیں، پنجاب پولیس کی طرف سے بہترین اور مکمل انتظامات پر مبارکباد دیتا ہوں۔

سردار خوشویندرسنگھ نے کہا کہ بابا نانک کا پیغام پوری دنیا کے لئے ہے آپس میں بھائی چارہ ہونا چاہئے، ہر سکھ کی خواہش اور دعا ہے کہ اپنے مذہبی مقامات کی یاترا کرے، وہ وقت دور نہیں جب پوری دنیا کے سکھ اپنے مذہبی مقامات کی یاترا کریں گے۔

خیال رہے کہ 1148 بھارتی سکھ یاتری سپیشل بسوں کے ذریعے گوردوارہ جنم استھان ننکانہ پہنچے تھے، ڈپٹی کمشنر، ڈی پی او اور وقف املاک بورڈ کے حکام نے بھارتی سکھ یاتریوں کا استقبال کیا تھا۔