بیجنگ: چین نے واشنگٹن میں ایک تقریب کے دوران پیش آنے والے فائرنگ کے واقعے پر سخت ردعمل دیتے ہوئے اس کی مذمت کی ہے اور کہا ہے کہ وہ صورتحال پر گہری نظر رکھے ہوئے ہے۔
چینی وزارتِ خارجہ کے ترجمان لِن جیان نے اپنے بیان میں کہا کہ چین ہر قسم کی غیر قانونی اور پرتشدد کارروائیوں کی مخالفت کرتا ہے اور ایسے واقعات کی واضح طور پر مذمت کرتا ہے۔ انہوں نے مزید کہا کہ واقعے سے متعلق پیش رفت کو مسلسل مانیٹر کیا جا رہا ہے۔
میڈیا رپورٹس کے مطابق یہ واقعہ وائٹ ہاؤس کورسپونڈینٹس ڈنر سے منسلک ایک تقریب کے دوران پیش آیا، جس کے بعد سیکیورٹی حکام نے امریکی صدر ڈونلڈ ٹرمپ اور خاتونِ اوّل میلانیا ٹرمپ سمیت دیگر شرکاء کو محفوظ مقام پر منتقل کر دیا۔
رپورٹس کے مطابق واقعے میں ایک پولیس اہلکار زخمی ہوا جسے فوری طبی امداد فراہم کی گئی اور اس کی حالت خطرے سے باہر بتائی جا رہی ہے۔ سیکیورٹی اداروں نے ایک مشتبہ شخص کو حراست میں لے لیا ہے، جبکہ واقعے کی تحقیقات جاری ہیں۔
امریکی حکام کا کہنا ہے کہ بروقت سیکیورٹی اقدامات کے باعث صورتحال کو قابو میں رکھا گیا، جبکہ واقعے کے بعد عالمی رہنماؤں کی جانب سے مذمت اور یکجہتی کے بیانات بھی سامنے آئے ہیں۔
