عدالت کا بشریٰ بی بی کی عمران خان سے ملاقات کرانے کا حکم

راولپنڈی: انسداد دہشتگردی عدالت نے 26 نومبر کے مقدمات کی سماعت کے دوران بشریٰ بی بی کی بانی پی ٹی آئی عمران خان سے ملاقات کرانے کا حکم دے دیا۔
بشریٰ بی بی کو راولپنڈی میں درج مقدمات میں شامل تفتیش کرنے کے لئے پولیس ٹیمیں جیل پہنچیں اور حالیہ احتجاج کے 10مقدمات میں انہیں باضابطہ طور پر شامل تفتیش کر لیا گیا۔
سابق خاتون اوّل نے پولیس کی ابتدائی تفتیش میں بیان دینے سے انکار کردیا، بشریٰ بی بی نے پولیس کے سوالوں کے جوابات عمران خان سے مشاورت سے مشروط کردیئے۔
بعد ازاں بانی پی ٹی آئی عمران خان کی اہلیہ بشریٰ بی بی کو اڈیالہ جیل میں 26 نومبر کے بعد درج ہونے والے 31 مقدمات کی سماعت کے سلسلے میں جج امجد علی شاہ کی عدالت میں پیش کیا گیا۔
بشریٰ بی بی نے کہا کہ شامل تفتیش ہونے سے قبل شوہر عمران خان اور اپنے وکیل سلمان صفدر سے مشاورت کرنی ہے، مشاورت کے بعد اپنا بیان ریکارڈ کروانے کے لیے تیار ہوں، بانی پی ٹی آئی اور وکیل سلمان صفدر سے اگر آج ملاقات کروا دی جائے تو آج ہی شامل تفتیش ہونے کو تیار ہوں۔
بشریٰ بی بی نے عدالت سے بانی پی ٹی آئی کی موجودگی میں شامل تفتیش ہونے کی بھی درخواست کی جس پر عدالت نے ایس او پیز کے مطابق بشریٰ بی بی کی عمران خان اور ان کے وکیل سے ملاقات کروانے کا حکم دے دیا اور کیس کی مزید سماعت 7 مارچ تک ملتوی کردی۔