اسلام آباد: نائب وزیراعظم و وزیر خارجہ سینیٹر محمد اسحاق ڈار کی زیر صدارت پیٹرولیم سے متعلق ایک اہم اجلاس منعقد ہوا، جس میں ملک میں ایندھن کے موجودہ ذخائر اور سپلائی کی صورتحال کا جائزہ لیا گیا۔
اجلاس کے دوران نائب وزیراعظم نے ایندھن کے وافر ذخائر اور تسلی بخش سپلائی پر اطمینان کا اظہار کیا۔ انہوں نے متعلقہ اداروں کو ہدایت کی کہ سپلائی چین کی سخت نگرانی کو یقینی بنایا جائے تاکہ ملک بھر میں ایندھن کی بلا تعطل فراہمی جاری رہے اور صارفین کے مفادات کا تحفظ کیا جا سکے۔
انہوں نے وزارتِ پیٹرولیم اور متعلقہ محکموں کو ہدایت کی کہ وہ مارکیٹ کی صورتحال پر کڑی نظر رکھیں اور باہمی رابطہ کاری کے نظام کو مزید مضبوط بنائیں تاکہ ایندھن کی سپلائی ملک بھر میں مستحکم رہے۔
اجلاس میں وزیر پیٹرولیم، وزیر موسمیاتی تبدیلی، وزیر اطلاعات و نشریات، وزیر آئی ٹی و ٹیلی کمیونیکیشن، سیکرٹریز پیٹرولیم و آئی ٹی سمیت مختلف وزارتوں اور محکموں کے اعلیٰ حکام نے شرکت کی۔
