واشنگٹن: حال ہی میں ہوئی ایک تحقیق میں انکشاف کیا گیا ہے کہ وہ امریکی نوجوان جو کسی نہ کسی نشے میں ملوث ہیں، انہوں نے ذہنی تناوٴ کو منشیات استعمال کرنے کی سب سے بڑی وجہ قرار دیا ہے۔
میڈیا رپورٹس کے مطابق امریکی محققین کی ٹیم کا کہنا ہے کہ یہ نئی تحقیق نوجوانوں کے لیے ذہنی صحت کی بہتر دیکھ بھال کی ضرورت پر روشنی ڈالتی ہے۔
سینٹرز فار ڈیزیز کنٹرول اینڈ پریوینشن (سی ڈی سی پی) کے ماہرین نے کہا ہے کہ علاج تک بہتر رسائی اور ذہنی صحت کی بہترین دیکھ بھال نوجوانوں میں منشیات استعمال کرنے کے رجحان اور اسکے نتیجے میں تناوٴ کو کم کیا جاسکتا ہے۔
سینئر محقق سارہ کونولی کی قیادت میں ٹیم نے 13 سے 18 سال کی عمر کے 9,500 سے زائد نوجوانوں کے 2014 سے 2020 کے اعداد و شمار کا جائزہ لیا جن میں سے سبھی کسی نہ کسی قسم کی منشیات استعمال کررہے تھے۔
نوجوانوں کی جانب سے مختلف اقسام کی منشیات استعمال کرنے کی اطلاع دی گئی جس میں الکوحل، چرس، درد کش ادویات، valium اور xanax شامل تھیں۔
محققین کی جانب سے نوجوانوں سے پوچھا گیا کہ وہ کیوں منشیات استعمال کررہے تھے جس پر انہوں نے بتایا کہ زندگی میں تناوٴ کو کم کرنا زیادہ منشیات استعمال کرنے کی اہم وجہ ہے۔
