ڈی چوک احتجاج ، عمر ایوب، زرتاج گل سمیت دیگر کی عبوری ضمانت میں توسیع

اسلام آباد: انسداد دہشت گردی عدالت اسلام آباد نے ڈی چوک احتجاج سے متعلق کیس میں پی ٹی آئی رہنماوٴں عمر ایوب، رزتاج گل سمیت دیگر کی عبوری ضمانت میں توسیع کر دی۔
اسلام آباد کی انسداد دہشتگردی عدالت کے جج ابوالحسنات ذوالقرنین نے عمر ایوب، زرتاج گل، شیر افضل مروت، علی بخاری اور شعیب شاہین کی عبوری ضمانتوں پر سماعت کی۔
دوران سماعت پراسیکیوٹر چودھری زاہد آصف نے عدالت کو بتایا کہ ابھی تک کوئی بھی ملزم شامل تفتیش نہیں ہوا۔
جج نے استفسار کیا کہ ملزمہ زرتاج گل آئی ہیں، رزتاج گل نے روسٹرم پر آ کر کہا کہ عدالت سے درخواست ہے پولیس یہیں پر شامل تفتیش کرے۔ جج نے ریمارکس دئیے کہ یہ عدالت ہے پولیس سٹیشن نہیں، آپ کی حد تک اس حوالے سے حکم نامہ جاری کر دیتا ہوں۔
بعدازاں عدالت نے پی ٹی آئی رہنماوٴں عمر ایوب، رزتاج گل سمیت دیگر کی عبوری ضمانت میں توسیع کرکے سماعت 7 فروری تک ملتوی کر دی۔
خیال رہے کہ ملزمان کے خلاف تھانہ رمنا، سیکرٹریٹ، مار گلہ، کراچی کمپنی اور کوہسار میں مقدمات درج ہیں۔