مکہ مکرمہ: وفاقی وزیر برائے مذہبی امور سردار محمد یوسف نے مکہ مکرمہ میں بطحاء قریش کے سیکٹر 10 کا اچانک دورہ کیا، جہاں انہوں نے پاکستانی عازمینِ حج کے لیے کیے گئے انتظامات کا تفصیلی جائزہ لیا۔
اس موقع پر پاکستانی حج مشن کے کوآرڈینیٹر ذوالفقار خان اور ڈپٹی کوآرڈینیٹر آپریشنز صداقت بھی اُن کے ہمراہ تھے۔ سردار محمد یوسف نے خوراک کی فراہمی، رہائش کی سہولیات اور عمارتوں میں قائم ڈسپنسریوں کی کارکردگی کا معائنہ کیا۔ انہیں خوراک کے معیار، صفائی کے انتظامات، شکایات کے فوری ازالے کے نظام اور دیگر انتظامات کے بارے میں بریفنگ دی گئی۔
دورے کے دوران وفاقی وزیر نے مختلف رہائشی عمارتوں میں مقیم پاکستانی عازمین حج سے ملاقات کی اور ان سے براہِ راست سہولیات کے معیار پر تبادلہ خیال کیا۔ متعدد عازمین نے انتظامات پر اطمینان کا اظہار کیا، تاہم بعض نے معمولی نوعیت کی شکایات بھی پیش کیں، جن کے فوری ازالے کے لیے سردار محمد یوسف نے موقع پر ہی متعلقہ حکام کو ہدایات جاری کیں۔
وفاقی وزیر نے اس موقع پر کہا کہ حکومتِ پاکستان عازمین حج کی خدمت کو قومی فریضہ سمجھتی ہے اور اس مقصد کے لیے تمام وسائل بروئے کار لائے جا رہے ہیں تاکہ ہر حاجی کو حج کے مقدس فریضے کی ادائیگی کے دوران زیادہ سے زیادہ سہولت فراہم کی جا سکے۔
سردار محمد یوسف کا کہنا تھا کہ حج مشن کی کارکردگی کو مسلسل مانیٹر کیا جا رہا ہے اور کسی قسم کی کوتاہی یا شکایت پر فوری کارروائی کی جا رہی ہے۔
