فیلڈ مارشل سید عاصم منیر کی ایرانی مسلح افواج کے چیف آف جنرل اسٹاف سے ملاقات، خطے کی سیکیورٹی صورتحال پر تبادلہ خیال

راولپنڈی :پاکستان کے چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری)، نے ایران کے دارالحکومت تہران میں جنرل اسٹاف ہیڈکوارٹرز کا دورہ کیا۔ ایرانی مسلح افواج کے چیف آف جنرل اسٹاف، میجر جنرل محمد باقری سے ملاقات خطے کی بدلتی ہوئی سیکیورٹی صورتحال پر تفصیلی تبادلہ خیال کیاگیا۔
آئی ایس پی آر کے مطابق چیف آف آرمی اسٹاف فیلڈمارشل سید عاصم منیر وزیراعظم کے وفد کے ہمراہ ترکی، ایران اور آذربائیجان کے سرکاری دورے پر ہیں۔
دورہ کے دوران فیلڈ مارشل سید عاصم منیر نے ایرانی مسلح افواج کے چیف آف جنرل اسٹاف، میجر جنرل محمد باقری سے ملاقات کی۔ دونوں عسکری قائدین کے درمیان خطے کی بدلتی ہوئی سیکیورٹی صورتحال پر تفصیلی تبادلہ خیال ہوا۔
آئی ایس پی آر کے مطابق ملاقات میں دوطرفہ دفاعی تعلقات کو مزید مضبوط بنانے پر زور دیا گیا۔دونوں ممالک کے درمیان تعاون بڑھانے کے لیے کلیدی شعبوں پر بات چیت ہوئی۔ جن میں عسکری تعاون کو وسعت دینا، مشترکہ سرحد پر سیکیورٹی کے مؤثر انتظامات کو بہتر بنانا، اور سرحدی علاقوں کو تجارت و اقتصادی روابط کے مراکز میں تبدیل کرنے کے امکانات شامل تھے۔
آئی ایس پی آر کاکہناہے کہ ملاقات میں خطے میں استحکام اور خوشحالی کے فروغ کے لیے بات چیت ہوئی۔
فیلڈ مارشل سید عاصم منیر کی آمد پر ایرانی مسلح افواج کے چاک و چوبند دستے نے روایتی گارڈ آف آنر پیش کیا۔
آئی ایس پی آر کے مطابق چیف آف آرمی اسٹاف نے قبل ازیں وزیراعظم پاکستان کے ہمراہ ایران کے سپریم لیڈر آیت اللہ سید علی حسینی خامنہ ای اور ایران کے صدرمسعود پزشکیان سے ملاقات کی۔