اسلام آباد: حکومتِ پاکستان نے عیدالفطر کے موقع پر جاری دہشت گردی کے خلاف کارروائی “آپریشن غضبُ للحق” میں عارضی وقفے کا اعلان کر دیا ہے۔
وزیر اطلاعات و نشریات عطاء اللہ تارڑ نے ایکس پر ایک بیان میں کہا کہ یہ فیصلہ حکومت نے اپنی صوابدید پر کیا ہے، جبکہ برادر اسلامی ممالک مملکتِ سعودی عرب، ریاستِ قطر اور جمہوریہ ترکیہ کی درخواست کو بھی مدنظر رکھا گیا ہے۔
انہوں نے بتایا کہ یہ وقفہ 18 اور 19 مارچ کی درمیانی شب سے شروع ہو کر 23 اور 24 مارچ کی درمیانی شب تک نافذ العمل رہے گا۔ اس دوران افغانستان میں دہشت گردوں اور ان کے سہولت کاروں کے خلاف جاری کارروائیاں عارضی طور پر معطل رہیں گی۔
عطاء اللہ تارڑ نے کہا ہے کہ یہ اقدام نیک نیتی اور اسلامی روایات کے مطابق کیا جا رہا ہے۔ تاہم واضح کیا گیا ہے کہ اگر اس دوران سرحد پار سے کسی قسم کا حملہ، ڈرون حملہ یا پاکستان کے اندر کوئی دہشت گردی کا واقعہ پیش آیا تو “آپریشن غضبُ للحق” فوری طور پر پہلے سے زیادہ شدت کے ساتھ دوبارہ شروع کر دیا جائے گا۔
