حماس کا کینیڈا، فرانس اور برطانیہ کی اسرائیل کو وارننگ کا خیر مقدم

غزہ: فلسطینی مزاحمتی تنظیم حماس نے کینیڈا، فرانس اور برطانیہ کی جانب سے اسرائیل کو غزہ اور مقبوضہ مغربی کنارے پر حملے روکنے کی وارننگ کا خیر مقدم کیا ہے۔ ان ممالک نے اپنے مشترکہ بیان میں کہا ہے کہ اگر اسرائیل نے اپنی جارحانہ کارروائیاں نہ روکیں تو اس پر ” پابندیاں” عائد کی جا سکتی ہیں۔
حماس نے تینوں ممالک کے اس موقف کو بین الاقوامی قانون کے اصولوں کی بحالی کی جانب ایک اہم قدم قرار دیا ہے اور کہا ہے کہ عالمی برادری کو اسرائیلی جارحیت کے خلاف سنجیدہ اقدامات اٹھانے چاہئیں۔
بیان میں مغربی ممالک نے حالیہ دنوں میں اسرائیلی حکام کی جانب سے اختیار کی گئی نفرت انگیز زبان پر بھی شدید تشویش کا اظہار کیا، جس میں فلسطینی شہریوں کی زبردستی نقل مکانی کی بات کی گئی تھی۔
تینوں ممالک نے واضح کیا کہ “مستقل جبری نقل مکانی بین الاقوامی انسانی قانون کی کھلی خلاف ورزی ہے” اور اس عمل کو کسی صورت برداشت نہیں کیا جا سکتا۔
خیال رہے کہ اسرائیل کی مسلسل زمینی اور فضائی کارروائیوں نے غزہ کو مکمل تباہی کے دہانے پر پہنچا دیا ہے۔ اب تک 53,000 سے زائد فلسطینی شہید ہو چکے ہیں جن میں بڑی تعداد خواتین، بچوں اور بوڑھوں کی ہے، جبکہ تقریباً 2.3 ملین افراد بے گھر ہو چکے ہیں-