اسلام آباد: پاکستان کے آٹو سیکٹر میں نمایاں پیش رفت سامنے آئی ہے جہاں اسپیشل انویسٹمنٹ فسیلیٹیشن کونسل (ایس آئی ایف سی) صنعتی ترقی اور سرمایہ کاری کے فروغ میں کلیدی کردار ادا کر رہی ہے۔
رپورٹس کے مطابق پاکستان کی آٹو صنعت نہ صرف مقامی طلب پوری کر رہی ہے بلکہ عالمی سطح پر ترقی اور توسیع کے لیے بھی تیار ہو چکی ہے۔ آٹو سیکٹر کی پیداواری صلاحیت سالانہ 500,000 یونٹس تک پہنچ گئی ہے۔
فروری 2026 میں مسافر گاڑیوں کی فروخت میں سالانہ بنیاد پر 51 فیصد اضافہ ریکارڈ کیا گیا جبکہ اسی ماہ فروخت ہونے والی گاڑیوں کی تعداد 13,388 یونٹس رہی جو صنعتی ترقی اور مارکیٹ میں بڑھتی ہوئی طلب کی عکاسی کرتی ہے۔
ماہرین کے مطابق مضبوط پیداواری صلاحیت اور بڑھتی ہوئی طلب کے باعث پاکستان کی آٹو صنعت سرمایہ کاری کے لیے ایک اہم شعبہ بنتی جا رہی ہے۔ ملک میں صنعتی توسیع، پیداواری صلاحیت میں اضافہ اور معاشی بحالی ایس آئی ایف سی کے تعاون اور سرمایہ دوست ماحول کا واضح مظہر ہے۔
