اسلام آباد :معرکہ حق میں ذلت آمیز شکست کے بعد بھارت اپنی پراکسیز کے ذریعے پاکستان میں دہشتگردانہ کارروائیوں میں ملوث ہے۔
سیکیورٹی ذرائع کے مطابق کوئٹہ میں 30 ستمبر کو صبح 11 بج کر 36 منٹ پر ایف سی ہیڈکوارٹر کے قریب ایک خودکش دھماکا ہوا۔ دھماکے کے فوراً بعد پانچ دہشتگردوں نے ایف سی ہیڈکوارٹر میں داخل ہونے کی کوشش کی، تاہم سیکیورٹی فورسز نے نہایت مستعدی سے ان کی کوشش کو ناکام بنا دیا۔
ذرائع کا کہنا ہے کہ بروقت اور مؤثر کارروائی کرتے ہوئے سیکیورٹی فورسز نے پانچوں دہشتگردوں کو ہیڈکوارٹر کی دیوار کے باہر ہی جہنم واصل کر دیا۔ ہلاک دہشتگردوں کے قبضے سے بھاری مقدار میں اسلحہ، بارودی مواد اور گولیاں برآمد ہوئیں۔
سیکیورٹی ذرائع کے مطابق اس سے قبل بھی سیکیورٹی فورسز نے گزشتہ ایک ماہ کے دوران ژوب کے مختلف علاقوں میں بھارت کی پشت پناہی سے کام کرنے والی پراکسی تنظیم "فتنہ الخوارج ” کے خلاف کامیاب کارروائیاں کرتے ہوئے 60 سے زائد دہشتگردوں کو انجام تک پہنچایا ہے۔
