ویت نام میں برڈ فلو کی وجہ سے دو ماہ میں 53 شیر اور چیتے مر گئے

ہنوئی: ویت نام کے چڑیا گھروں میں برڈ فلو کی وجہ سے 50 سے زائد شیر اور چیتے ہلاک ہوگئے۔

خبررساں ادارے اے ایف پی کے مطابق بدھ کے روز سرکاری میڈیا نے رپورٹ کیا کہ ملک کے جنوبی حصے میں واقع مائی کیونہ سفاری پارک اور ووآن شوئی زو میں دو ماہ کے دوران 53 شیر اور چیتے ہلاک ہوئے ہیں۔

سرکاری خبر رساں ادارے وی این اے نے بتایا ہے کہ نیشنل سینٹر فار اینیمل ہیلتھ کی جانب سے کی گئی جانچ کے مطابق ان جانوروں کی موت H5N1 وائرس (برڈ فلو) کی وجہ سے واقع ہوئی۔

جنگلی حیات کے تحفظ کام کرنے والی غیرسرکاری تنظیم ایجوکیشن فار نیچر ویت نام ( ای این وی) کے مطابق گذشتہ سال کے اختتام تک ملک کے سرکاری اور نجی چڑیا گھروں میں شیر، ببرشیر اور چیتوں کی مجموعی تعداد 385 تھی۔ ان میں سے 310 جانور 16 نجی فارم ہاؤس اور چڑیاگھروں میں رکھے گئے ہیں، جبکہ باقی شیر سرکاری چڑیا گھروں میں ہیں۔

عالمی ادارہ صحت کے مطابق 2022 سے ممالیہ میں برڈ فلو کی وبا پھیلنے کے واقعات میں اضافہ ہورہا ہے۔ یہ وائرس انسانوں کو بھی متاثر کرسکتا ہے اور شدید صورت میں انسان کی موت بھی واقع ہوسکتی ہے۔ رواں سال تھائی لینڈ میں واقع دنیا کے سب سے بڑے بریڈنگ فارم میں برڈ فلو کی وجہ سے درجنوں شیروں کی موت واقع ہوگئی تھی۔