اسلام آباد:پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان کی جانب سے بھارت میں دہشت گردی کے الزامات گمراہ کن ہیں ۔ پاکستان خود دہشت گردی کا شکار رہاہے ۔ ان عناصر کے خلاف بھرپور کاروائیاں جاری ہیں جسے دنیا کو تسلیم کرنا چاہیے ۔
بھارتی میڈیا دی وائر کو انٹرویو دیتے ہوئے بلاول بھٹو نے واضح کیا کہ مقبوضہ جموں و کشمیر کے علاقے پہلگام میں ہونے والے دہشت گرد حملے میں پاکستان کسی طور بھی ملوث نہیں اسی لیے پاکستان نے اس کی آزادانہ تحقیقات کا مطالبہ کیا تھا۔
چیئرمین پی پی پی نےکہاکہ ہمیں مل کر حقیقی چیلنجز کا سامنا کر نا ہوگا چاہے وہ دہشتگردی ہو، موسمیاتی تبدیلی یا عدم مساوات۔انہوں نے مزید کہاکہ ہمارا مستقبل ماضی کے تنازعات سے نہیں، بلکہ پُرامن بقائے باہمی، تعاون اور خوشحالی سے متعین ہوگا۔
