واشنگٹن:امریکہ کے صدر ڈونلڈ ٹرمپ نے ایک مرتبہ پھر ایران کو دھمکی دی ہے کہ ایٹمی پروگرام سے متعلق معاہدہ کرے یا حملے کیلئے تیارہو جائے۔
ٹروتھ سوشل پر جاری پیغام میں امریکی صدر نے کہا کہ امریکہ کا طیارہ بردار بحری بیڑہ ایران کی جانب گامزن ہے اور وقت تیزی سے ختم ہو رہا ہے ،یہ معاملہ نہایت اہم ہے۔ ایران کو پہلے بھی معاہدہ نہ کرنے پر بڑی تباہی کا سامنا کرنا پڑا۔ اگلا حملہ اس سے کہیں زیادہ شدید ہو گا۔امریکی صدر نے مزید کہا کہ امید ہے کہ ایران جلد ہی میز پر آئے گا اور ایک منصفانہ اور مساوی معاہدے پر بات چیت کرے گا۔
امریکی وزیر خارجہ مارکو روبیو نے بھی کہا کہ ایرانی حکومت ممکنہ طور پر پہلے سے زیادہ کمزور ہوگئی ہے۔امریکی سینیٹ کی خارجہ تعلقات کمیٹی میں بات کرتے ہوئے مارکو روبیو نےکہا کہ ایران کی معیشت زوال کا شکار ہے ۔انہوں نے کہا کہ مستقبل میں ایران میں ایک بار پھر احتجاجی مظاہرے شروع ہوں گے۔
