اسرائیل غزہ میں بچوں کا قتل عام بند کرے، دیا مرزا

ممبئی: بالی وڈ اداکارہ دیا مرزا نے ایک جذباتی پیغام میں اسرائیل سے مطالبہ کیا ہے کہ وہ غزہ میں بچوں کا قتل عام بند کرے ۔انسانیت کو بچانے کیلئے جنگ بندی ہونی چاہئے۔

بھارتی اداکارہ دیا مرزا نے انسٹاگرام پر اپنے پیغام میں لکھا کہ انسانیت کیلئے فوری طور پر جنگ بندی کردینی چاہئے، بچوں کی موت انصاف کا قتل عام ہے، ہمارے بچے بہت قیمتی ہیں، ان کا تعلق جس ملک اور خطے سے ہو، وہ مہربان، پیارے اور پرامن ہوتے ہیں۔

اداکارہ نے مزید لکھا کہ ہمیں اپنے بچوں کے متعلق سوچنا چاہئے جو بغیر کسی جرم کے ہولناک جنگوں کا شکار ہوگئے اور وہ بے بس ہیں، بطور ماں اور ایک انسان سمجھتی ہوں کہ اس ہولناک جنگ کو رکنا چاہئے اور انسانیت کو بچانے کیلئے جنگ بندی ہونی چاہئے۔

خیال رہے کہ اسرائیلی فضائیہ نے غزہ پر مسلسل بمباری جاری رکھی ہوئی ہے جن میں 5 مساجد، 8 چھوٹے بڑے اسپتال اور ہزاروں گھر تباہ ہوگئے جب کہ شہادتوں کی تعداد 13 ہزار سے تجاوز کرگئی جن میں نصف بچے اور خواتین ہیں۔