اسلام آباد: نائب وزیرِاعظم و وزیرِ خارجہ سینیٹر محمد اسحاق ڈارکی زیرِ صدارت ایک اہم اجلاس منعقد ہوا جس میں ضبط شدہ اور ٹمپرڈ گاڑیوں سے متعلق موجودہ قوانین اور پالیسیوں کا تفصیلی جائزہ لیا گیا۔
وفاقی بورڈ آف ریونیو (ایف بی آر) نے اس موقع پر قانونی دفعات پر مشتمل ایک جامع بریفنگ دی۔ اجلاس کے دوران ضبط شدہ گاڑیوں کی نیلامی، طریقہ کار کی بہتری اور ٹمپرڈ گاڑیوں کے استعمال سے متعلق مختلف تجاویز پر غور کیا گیا۔
نائب وزیرِاعظم نے ہدایت جاری کی کہ ایسی گاڑیوں کی جلد از جلد نیلامی کو یقینی بنایا جائے، نیلامی کے عمل کو ڈیجیٹلائز اور آؤٹ سورس کیا جائے، اور شفافیت و کارکردگی میں بہتری کے لیے بین الاقوامی بہترین طریقہ کار اپنائے جائیں۔
اجلاس میں وفاقی وزیر قانون و انصاف، معاونِ خصوصی وزیرِاعظم، اٹارنی جنرل آف پاکستان، سیکریٹری اطلاعات، چیئرمین ایف بی آر اور کسٹمز کے سینئر افسران نے شرکت کی۔
