پاک روس مشترکہ مشق دروزبہ 7 کا آغاز ہوگیا

راولپنڈی :پاکستان اور روس کی مشترکہ مشق دروزبہ 7 کا آغاز ہوگیا، پاکستان اور روس کی افواج کے درمیان انسداد دہشت گردی کے شعبے میں یہ ساتویں دو طرفہ مشترکہ مشق ہے۔

آئی ایس پی آر کے مطابق دو ہفتے طویل مشق کا 13 اکتوبر کو نیشنل کاوٴنٹر ٹیررازم سنٹر، پبی میں آغاز ہوا، جس میں پاکستانی اور روسی سپیشل فورسز کے دستے شرکت کررہے ہیں، کمانڈنٹ نیشنل کاوٴنٹر ٹیررازم سنٹر نے مشق کی افتتاحی تقریب میں بطور مہمان خصوصی شرکت کی۔

آئی ایس پی آر کاکہناہے کہ اس مشق کا مقصد مشترکہ تربیت کے ذریعے پیشہ ورانہ مہارتوں کو مزید نکھارنا ہے، جبکہ یہ مشق دوست ممالک کے درمیان تاریخی فوجی تعلقات کو مزید مستحکم کرے گی، حصہ لینے والے دستے باہمی مہارت اور تجربے سے استفادہ کر سکیں گے۔