پاکستان اور عالمی ادارۂ خوراک کے مابین موسمیاتی ہم آہنگ شراکت داری پر اتفاق

اسلام آباد:: وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک نے آج اقوامِ متحدہ کے عالمی ادارۂ خوراک (WFP) کی کنٹری ڈائریکٹر محترمہ کوکو اُشیاما سے ملاقات کی۔

ملاقات کا بنیادی مقصد پاکستان اور WFP کے درمیان آئندہ پانچ سال کے فریم ورک کے تحت موسمیاتی تناظر میں تعاون کے امکانات کا جائزہ لینا تھا۔

اس ملاقات میں پاکستان میں بچوں کی نشوونما میں رکاوٹ (STUNTING) کے سدباب کے لیے اٹھائے جانے والے اقدامات پر تبادلہ خیال کیا گیا جس میں خاص طور پر ان چار بنیادی عوامل ("4CS”) پر توجہ مرکوز کی گئی جو اس مسئلے کی جڑ ہیں۔

وفاقی وزیر ڈاکٹر مصدق ملک نے مؤثر پالیسی پر مبنی اقدامات اور مشترکہ منصوبوں کی اہمیت کو اجاگر کیا، جن کے ذریعے ماحولیاتی تبدیلی سے نمٹنے کی حکمت عملی کو مقامی سطح پر نافذ کیا جا سکے، بالخصوص ان علاقوں میں جہاں غذائی قلت اور موسمیاتی خطرات زیادہ ہیں۔