اسلام آباد:قومی اسمبلی کے اسپیکر سردار ایاز صادق نے پاکستان اور سعودی عرب کے مابین دفاعی معاہدے کا خیرمقدم کرتے ہوئے پوری قوم کو مبارکباد دی ہے۔
ایاز صادق نے کہا کہ پاکستان اور سعودی عرب کے درمیان دفاعی معاہدہ دونوں برادر ممالک کے تعلقات کے نئے باب کا آغاز ہے۔ انہوں نے کہا کہ قوم وزیراعظم محمد شہباز شریف اور فیلڈ مارشل سید عاصم منیر کی بصیرت اور قیادت پر فخر کرتی ہے۔
انہوں نے مزید کہا کہ مقامات مقدسہ اور سعودی عرب کی حفاظت و سلامتی میں کردار ادا کرنا پاکستان کے لیے باعثِ فخر ہے۔ ان کا کہنا تھا کہ دونوں ممالک کے درمیان یہ دفاعی معاہدہ دوستی کو مزید مستحکم کرنے کی علامت ہے۔
سردار ایاز صادق نے کہا کہ پاکستان اور سعودی عرب اسلام اور امن کی مشترکہ طاقت ہیں، دونوں ممالک کا اتحاد ناقابل شکست ہے اور ہمیشہ قائم رہے گا۔ انہوں نے اس بات پر بھی فخر کا اظہار کیا کہ وزیراعظم شہباز شریف نے ولی عہد محمد بن سلمان کے ساتھ اعتماد اور بھائی چارے کی نئی بنیاد رکھی ہے جبکہ پاکستان کے دفاع کو ناقابلِ تسخیر بنانے میں فیلڈ مارشل سید عاصم منیر کی کوششیں لائق تحسین ہیں۔
اسپیکر نے واضح کیا کہ پاکستان ہر قیمت پر امت مسلمہ کا دفاع اور تحفظ یقینی بنائے گا۔
