اسلام آباد:پاکستان نے اقوام متحدہ کے سیکرٹری جنرل کے اس اعلان کا خیرمقدم کیا ہے جس میں بچوں اور مسلح تنازعات پر سالانہ رپورٹ سے پاکستان کے حوالہ جات کو نکالنے کا فیصلہ کیا گیا ہے۔
ترجمان دفترخارجہ کے مطابق یہ اہم پیش رفت پاکستان کی حکومت کی اقوام متحدہ کے ساتھ تعمیری، مستقل اور گہری شراکت داری کا منہ بولتا ثبوت ہے، جس میں سیکرٹری جنرل کے خصوصی نمائندے برائے بچوں اور مسلح تنازعات (SRSG‑CAAC) کے دفتر کے ساتھ قریبی تعاون شامل ہے۔
یہ فیصلہ بین الاقوامی سطح پر پاکستان کی طرف سے بچوں کے حقوق اور فلاح و بہبود کے تحفظ کے لیے نافذ کردہ مضبوط ادارہ جاتی، قانونی اور پالیسی اقدامات کی تسلیم شدہ کامیابی ہے۔ اس سے پاکستان کے عالمی معیارات اور بہترین طریقوں کے ساتھ قومی قانونی اور ادارہ جاتی فریم ورک کو ہم آہنگ کرنے کے عزم کی تصدیق ہوتی ہے، تاکہ تنازعہ اور تشدد سے متاثرہ بچوں کے تحفظ کو یقینی بنایا جا سکے۔
ترجمان دفترخارجہ کاکہناہے کہ پاکستان اپنے عزم کا اعادہ کرتا ہے کہ وہ اقوام متحدہ کے ساتھ قریبی تعاون جاری رکھے گا تاکہ بچوں کے حقوق کے تحفظ اور فروغ کے لیے کوششوں کو مضبوط بنایا جا سکے اور آئندہ نسلوں کے لیے ایک محفوظ اور روشن مستقبل کو یقینی بنایا جا سکے۔
